वर्षा याममा पानीका मुहानहरु दुषित हुने भएकाले सल्यान रीमका स्थानियहरु खानेपानीका मुहानहरुको संरक्षण तथा सरसफाईमा जुटेका छन् ।
सल्यानको रीम गाविस वडा न. २ मेलचौरका स्थानियहरु खानेपानीका मुहानहरुको संरक्षण तथा सरसफाईमा जुटेका हुन् । मेलचौरमा रहेको पाखापानी खानेपानी आयोजनाका अध्यक्ष टोप बहादुर खड्काको नेतृत्व तथा सचिव किरण डिसी लगाएतका खानेपानी आयोजनाका पदाधीकारीहरुको सक्रियतामा खानेपानीको मुहान र्याली मा सरसफाई तथा बृक्षारोपण गरिएको छ ।
मेलचौरको झन्डै १ किमी टाढा र्याली बाट उक्त गाउँमा पानी आउने गर्दछ । सो मुहानको पानी बाट १४ घरधुरी प्रत्यक्ष लाभान्बित भएका छन् । बर्षायाममा खानेपानीको मुहान फोहोर हुने भएकाले खानेपानीको मुहानमा सरसफाई तथा बृक्षारोपण गरिएको अध्यक्ष खड्काले बताउनु भयो । उहाँले दुषित पानीका कारण विभिन्न सरुवा रोगहरु लाग्न सक्ने भएकाले त्यस्ता रोग बाट बचनको लागी समयमा नै पानीको मुहानको सरसफाई लागेको बताउनु भयो ।
पानीको मुहानको सरसफाई सँगै मुहान वरिपरि बृक्षारोपण समेत गरिएको छ । सफा पानी स्वथ्य जिन्दगानी भन्ने ध्येयका साथ विभिन्न जातका २ सय बढी बिरुवा रोपिएको छ ।
मुहान वरिपरि रयाज, बुकाईनो, लिपलिपे, सल्ला लगाएतका बिरुवा रोपिएको सचिव डिसीले जानकारी दिनु भयो । खानेपानीको मुहानमा सफा र हराभरा बनाउने उद्देश्यले पाखापानी खानेपानी आयोजनाका पदाधिकारी सक्रिय भएर लागेको स्थानीय जनक डिसीले जानकारी दिनु भयो
