२१ असोज, काठमाडौँ । नेपाल क्रिकेट संघ (क्यान) ले सचिव अशोकनाथ प्याकुर्याल र उपाध्यक्ष राजुबाबु श्रेष्ठको राजीनामा स्वीकृत गरेको छ । असोज २० र २१ गते बसेको कार्य समिति बैठकले सो निर्णय गरेको हो । क्यानले प्रशान्त विक्रम मल्ललाई १० दिनको लागि कार्यकारी सचिवको रूपमा नियुक्त गरेको छ ।
त्यस्तै, क्यानले लिगका लागि भारतीय कम्पनीसँग गरेको विवादास्पद सम्झौता रद्द गर्ने भएको छ । सम्झौता कार्यान्वयनका लागि सरकारले अनुमति नदिएको र सेभन थ्री स्पोर्टसले गर्नुपर्ने सम्झौता अनुरुपका कामहरु नगरेकाले रद्द प्रक्रिया अघि बढाउने निर्णय गरेको अध्यक्ष चतुरबहादुर चन्दले विज्ञप्तिमार्फत जानकारी दिएका छन् ।
साथै,क्यानले आइसिसी महिला टी–२० विश्वकप एसियाली छनोटको लागि नेपाली महिला क्रिकेट टोलीको बन्द प्रशिक्षण बोलाएको छ । बन्द प्रशिक्षण काठमाडौंमा हुने क्यानले जनाएको छ ।
