३० भदाै, प्युठान । नेपाली काँग्रेस प्युठानका सचिव समेत रहेका गौमुखी गाउँपालिकाका अध्यक्ष विष्णु कुमार गिरीमाथि लागेको बहुविवाहको आरोप खारेज भएकाे छ ।
गिरीमाथि लागेको बहुविवाह आरोपकाे मुद्दाकालागि प्रमाण नपुगेको भन्दै, जिल्ला सरकारी वकिल कार्यालय प्यूठानले अदालतमा उजुरी दर्ता नगर्ने निर्णय गरेको हो ।
निमित्त जिल्ला न्यायाधिवक्ता शिवप्रसाद आचार्यका अनुसार, जिल्ला अदालत समक्ष मुद्दा दर्ता नगर्ने निर्णय गरी उच्च सरकारी वकिलको कार्यालयमा पठाइएको हाे ।
गत भदौं १० गते श्रीमति सीता केसीले फेसबुक च्याटका कुराकानी र फोटोहरुको आधारमा बहुविवाह गरेको भन्दै हुलाक मार्फत प्रहरी समक्ष उजुरी गरेकी थिइन् ।
हिरासतबाट मुक्त भए पश्चात् अध्यक्ष गिरीले न्यायकाे महशुस भएकाे भन्दै सहानुभुती राख्ने सबैलाई धन्यवाद दिएका छन् । बहुविवाह नगरेको र प्रहरीलाई अनुसन्धानमा सहयोग गर्ने भन्दै अध्यक्ष गिरी १५ भदौमा प्रहरी समक्ष स्वयम् उपस्थित भएका थिए ।
