Logo

लागु औषधसहित ७ समातिए



Spread the love

७ फागुन, रुकुम – रुकुम पश्चिममा अवैध लागुऔषध र ट्याबलेटसहित ७ जना पक्राउ परेका छन् । पक्राउ परेका सातमध्ये पाँच जनासँग अवैध चरेश र दुई जनासँग लागुऔषध ट्याबलेट फेला परेको प्रहरी नायब उपरीक्षक ठगबहादुर केसीले जानकारी बताए ।

जिल्ला प्रहरी कार्यालय रुकुम पश्चिमले मंगलबार पत्रकार सम्मेलन गरी लागुऔषध चरेश र ट्याबलेट कारोवारीलाई एकैसाथ सार्वजनिक गरेको हो । पक्राउ पर्नेमा आठबिसकोट नगरपालिका–११ का २८ वर्षीय विमलकुमार शाही र सानीभेरी गाउँपालिका–४ का बलबहादुर चन्द रहेका छन् । त्यस्तै बाँफीकोट गाउँपालिका–८ का २३ वर्षीय लक्ष्मण केसी र सोही गाउँपालिका–५ का ३१ वर्षीय महेन्द्रकुमार केसी रहेको प्रहरीको भनाइ छ । प्रहरी नायब उपरीक्षक केसीका अनुसार गएको माघ २४ गते बिहान ४ बजे आठबिसकोट नगरपालिका–१४ छेपारेमा अवैधरुपमा लुकाइछिपाइ राखेको स्थानबाट चारलाई पक्राउ गरिएको हो ।

पक्राउ परेका चारैबाट २७५ ग्राम परिमाणको खैरो रङको सेलेदार चरेश, अफिमजस्तो देखिने ३० ग्राम कालो अर्ध ठोस पदार्थ र १३ किलोग्राम खैरो रङको अर्ध ठोस पदार्थ बरामद गरिएको बताइएको छ । पक्राउ परेका चारैलाई रुकुम जिल्ला अदालतबाट पहिलोपटक म्याद थप भई अनुसन्धान कार्य भइरहेको प्रहरीले बताएको छ ।

त्यस्तै जिल्लाको मुसिकोट नगरपालिका–१ घ्यूखोलाबाट रुकुम पूर्व पुथाउत्तरगङ्गा गाउँपालिका–१० का १९ वर्षीय सिलास बुढालाई आइतबार प्रहरीले पक्राउ गरेको छ । बुढाको साथबाट एक किलोग्राम लागुऔषध चरेश, जनावरको जस्तो देखिने ७०० ग्राम सुकुटी र कस्तुरीको एक थान दाँत फेला परेको प्रहरीले जनाएको छ ।

त्रिवेणी गाउँपालिका–३ झुल्नेटा बजारबाट मुसिकोट नगरपालिका–३ का २१ वर्षीय विष्णु कसेरा र पुथा उत्तरगङ्गा गाउँपालिका–१४ का १९ वर्षीय गायस पुनलाई लागुऔषध ट्याबलेटसहित प्रहरीले पक्राउ गरेको छ । पक्राउ परेका कसेरा र पुनको साथबाट अवैध लागुऔषध ट्रमाडोल १७७ क्याप्सुल र २५७ विभिन्न नामका लागुऔषध ट्याबलेट बरामद गरिएको प्रहरी नायब उपरीक्षक केसीको भनाइ छ । उनीहरुमाथि अनुसन्धान भइरहेको प्रहरीले जनाएको छ ।

प्रतिक्रिया दिनुहोस्