चितवनमा वाम गठबन्धनले आज आयोजना गरेको प्रचण्ड पुत्र प्रकाश दाहालको श्रद्धान्जली सभामा गीत गाउँदागाउँदै ढलेका गायक तथा पूर्व सांसद खुशीराम पाख्रिनको निधन भएको छ ।
उनलाई उपचारका लागि तत्काल नारायणी सामुदायिक अस्पताल लगिएको थियो । अस्पतालका मेडिकल स्टाफ सरिता तिवारीका अनुसार ब्रेन ह्यामरेज भएका उनको शव आफन्त तथा परिचितले भर्खरै अस्पतालबाट बाहिर लिएर गएका छन् । उनको हृदयघातबाट निधन भएको अस्पताल स्रोतले जनाएको छ । सभास्थलमा रहँदा असहज महसुस भएपछि पाख्रिनलाई नारायण सामुदायिक अस्पताल लगिएको थियो ।
सभामा जनगायक पाख्रिनले गीत गाएका थिए । माओवादीले सञ्चालन गरेको सशस्त्र युद्धकालमा पाख्रिनले गाएका ‘भोका नाङ्गा नानीहरुु गीत निकै चर्चित बनेको थियो । उनी २०३८ सालदेखि जनतालाई चेतना जगाउने गीत लेख्दै गाँउदै र तीनमा संगीत भर्दै हिँडेका थिए । जनताको मूक्तिको सपना देखेर युद्धमा होमिएका खुशीरामले आफ्ना छोरा अमरलाई युद्धकालमै गुमाएका थिए ।
जनवादी गायकका रुपमा परिचित पाख्रिनलाई माओवादीले यसअघि चितवन ४ मा भएको उपनिर्वाचनमा उम्मेदवार पनि बनाएको थियो । श्रद्धाञ्जली सभालाई एमाले नेता माधवकुमार नेपालले सम्बोधन गर्नुभएको थियो भजे सभामा माओवादी केन्द्रका अधयक्ष पुष्पकमल दाहाल र उहाँकी पत्नी सीता दाहाल पनि उपस्थित हुनुहुन्थ्यो ।
