नेत्रविक्रम चन्द विप्लव नेतृत्वको नेपाल कम्युनिष्ट पार्टी निकट रहेको अखिल नेपाल जनसाँस्कृतिक महासंघले यही फागुन २६ गते टुँडिखेलमा हुने सलमान खानको कार्यक्रम स्थगित गर्न माग गरेको छ । यही आउँदो फागुन २६ गते टुँडिखेलमा हुने कार्यक्रमको लागी बलिउड अभिनेता सलमान खान नेपाल आउँदै छन् । केही समय अघिबाट नै उनी नेपाल आउने खबर सञ्चार माध्यममा आइरहेको थियो ।
महासङ्घले अनावश्यक मदिराको प्रचारप्रसार गरेको र दसौँ हजार टिकट बेचिएको भन्दै कार्यक्रम नगर्न माग गरेको हो । यदि आफुहरुको कुरा बेवास्ता गरेमा कार्यक्रम बिथोल्ने आन्दोलन गर्न चेतावनी दिएका छन् ।
टुँडिखेलमा हुने ‘दबंग द टूर’ कार्यक्रमको लागी सलमानको साथमा बलिउड नायिका सोनाक्षी सिन्हा, डान्स मास्टर प्रभु देवा, डेजी शाह, कृति सेनोन र पञ्जाबी भांगडा डान्सर ‘मिड बोस’, मनिष पल मार्च ९ मा नेपाल आइपुग्ने छन् । ओडिसी इन्टरटेनमेन्टले आयोजना गर्न लागेको कार्यक्रममा नेपाली कलाकारहरूले पनि प्रस्तुति दिदैँछन् ।
