इण्डियन प्रिमियर लिग (आईपीएल) अन्तर्गत आज राती हुने दिल्ली क्यापिटल्स भर्सेस कोलकत्ता नाइट राइडर्सको भिडन्तमा दिल्लीबाट नेपाली लेग स्पिनर सन्दीप लामिछानेले खेल्ने सम्भावना अत्यधिक रहेको क्रिकेटका पण्डितहरूले बताएका छन् ।
खेल दिल्लीस्थित फिरोज कोट्ला स्टेडियममा नेपाली समय अनुसार आज राती ८:१५ मा सुरु हुनेछ ।
यसअघि भएका खेलमा दिल्लीले सन्दीप बिनाका दुई खेलमा एक जित तथा एक हार व्यहोरेको छ । उता अर्को प्रतिद्वन्दि कोलकत्ता भने दुबै खेलमा विजेता भइसकेको छ । यस्तोमा कोलकत्ताले अपराजित यात्रालाई निरन्तरता दिने कोशिस गर्नेछ । दिल्ली भने दोस्रो जितको खोजीमा हुनेछ ।
दिल्लीको घरेलु मैदान कोट्लामा स्पिन बलरलाई मद्दत मिल्ने पिच रहेको छ । र, दिल्लीसंग स्पिन बलिङमा थुप्रै बिकल्प रहेका छन् । तर, दुर्भाग्यको कुरा दुई खेल सकिदा खेलमा दिल्लीका कुनै पनि स्पिनरले राम्रो खेल पस्कन सकेका छैनन् ।
यस्तो अवस्थामा अघिल्ला दुई खेलबाट बञ्चित भएका नेपाली स्पिनर सन्दीपले मौका पाउने सम्भावना रहेको छ । कोलकत्ताविरुद्ध दिल्लीको लागि सन्दीप वैकल्पिक स्पिनर बन्न सक्ने छन् । सन्दीपले अघिल्लो सिजन कोट्ला मैदानमा नै ३ खेल खेल्दै ५ विकेट हात पारेका थिए ।
यस हिसाबले हेर्दा पनि आजको टिममा सन्दीप पर्ने सम्भावना अत्यधिक रहेको क्रिकेटका पण्डितहरूले बताएका छन् ।
साथै यसै सन्दर्भमा दिल्ली क्यापिटल्सले सन्दीपलाई नखेलाएको आवेगमा नेपाली क्रिकेट फ्यानहरूले दिल्लीको फेसबुक पेजमा हजारौं कमेन्ट बर्साइ रहेका छन् । सन्दीपलाई नखेलाउँदासम्म दिल्लीले जित हासिल गर्न नसक्ने उनीहरूको विश्वास छ । उनलाई नखेलाएर नेपाली क्रिकेटप्रेमीको अपमान भएको उनीहरूले लेखेका छन् ।
हेर्नुहोस् केही झलक :
यसरी रिसाएका नेपाली क्रिकेट प्रेमीहरूलाई मध्यनजर गर्दै दिल्ली क्यापिटल्सले सन्दीपको एउटा रमाइलो भिडियो पोष्ट गरेको छ ।
हेर्नुहोस् भिडियो :
