इण्डियन प्रिमियर लिग (आईपीएल) अन्तर्गत हिजो राती सम्पन्न दिल्ली क्यापिटल्स भर्सेस कोलकत्ता नाइट राइडर्सको भिडन्तमा नेपाली लेग स्पिनर सन्दीप लामिछानेको टिम दिल्लीले सुपर ओभरमा जित हासिल गर्न सफल भएको छ ।
कोलकत्ताविरुद्ध नेपाली शान सन्दीप लामिछानेले उत्कृष्ट प्रदर्शन गर्दै ४ ओभरमा २९ रन खर्चिएर १ विकेट लिए । साथै उनले एक खेलाडीलाई रन आउट पनि गराए ।
अघिल्ला दुई खेलमा बेन्चमै रहेका सन्दीपले कोलकत्ताविरुद्धको खेलमा उत्कृष्ट प्रदर्शन गर्न सफल रहे । उनले दिल्लीका लागि सबैभन्दा राम्रो बलिङ गरेका थिए ।
खेल दिल्लीस्थित फिरोज कोट्ला स्टेडियममा नेपाली समय अनुसार आज राती ८:१५ मा सुरु भएको थियो ।
दिल्लीको घरेलु मैदान कोट्लामा स्पिन बलरलाई मद्दत मिल्ने पिच रहेको मानिन्छ । यस्तो अवस्थामा अघिल्ला दुई खेलबाट बञ्चित भएका नेपाली स्पिनर सन्दीपले मौका पाउने सम्भावना रहेको थियो । कोलकत्ताविरुद्ध दिल्लीको लागि सन्दीप वैकल्पिक स्पिनर बने । सन्दीपले अघिल्लो सिजन कोट्ला मैदानमा नै ३ खेल खेल्दै ५ विकेट हात पारेका थिए ।
अघिल्ला दुई खेलमा नखेलाए सँगै दिल्ली विरुद्ध खनिएका नेपाली क्रिकेट प्रेमीहरू उनको यो खेलसँगै एकाएक खुसी भएका छन् । सन्दीपको दमदार खेलले नेपालीलाई थप हौसला प्रदान गरेको छ भने आगामी खेलमा पनि उनको शसक्त भुमिकाको अपेक्षा गर्न थालिएको छ ।
