विश्वकप क्रिकेट : बंगलादेशलाई हराउँदै अस्ट्रेलिया शीर्ष स्थानमा

६ असार, काठमाडौं । एकदिवसिय विश्वकप क्रिकेट प्रतियोगितामा साविक विजेता अष्ट्रेलिया अंक तालिकाको शीर्ष स्थानमा उक्लिएको छ ।
बिहीबार बंगलादेशलाई ४८ रनले पराजित गरेपछि इंग्ल्यान्ड र न्युजिल्यान्डलाई पछि पार्दै अष्ट्रेलिया शीर्ष स्थानमा उक्लिएको हो ।

३ सय ८२ रनको  विशाल लक्ष्य पछ्याएको बंगलादेशले निर्धारित ५० ओभरमा ८ विकेटको नोक्सानीमा ३ सय ३३ रन बनाउन सक्यो ।बंगलादेशको यो योगफल हालसम्मकै उसले एकदिवसीय खेलमा बनाएको सर्वाधिक ठूलो योगफल हो। यस पारीमा बंगलादेशका लागि मुस्फिकर रहमानले नटआउट १०२ रन बनाए भने महदुल्लाहले ६९, तामिम एकवालले ६२ तथा शाकिब अल हसनले ४१ रन जोडेका थिए।

योसँगै अष्ट्रेलिया ६ खेलमा ५ मा जित र १ मा हारकासाथ शीर्ष स्थानमा उक्लिएको छ । ५ खेलमा ४ मा जित निकालेको न्युजिल्यान्ड ९ अंकका साथ दोस्रो स्थानमा छ । ५ खेलमा ४ मा जित र १ मा हार ब्योहोरेको घरेलु टोली इंग्ल्यान्ड तेस्रो स्थानमा छ । ४ खेलमा ३ मा जित निकालेको भारत चौथो स्थानमा रहेको छ ।