-सरद बिष्ट
रोएका छन्
शरद यामका फूलहरू पनि
बोटमा चोट छ
फूलमा घाउ छ
मखमलीको रोदन छ
सयपत्रीको गुनासो छ ।
सधैँ फुलेर उमङ्ग
बनाउने
शरद यामका फूलहरूले
दसैँ तिहार रङ्गाएर जान्थे प्रकृतिलाई शृङ्गारेर जान्थे,
सुगन्धमय बनाएर, फेरि आउने वाचासहित ।
तर,
तिहारका फूलहरू
निराश छन् किन आज ?
कसले बिघ्न–वाधा पुराएछ बिचरा !
सबै घायल छन् ।
नयाँ याम, नयाँ पालुवा सँगै फुलेका सबै फूलहरू
बगैँचामा रोएका छन्
एक–एक जम्मा भएर
आपसमा आपत्ति जनाउँदै
अब नयाँ संसारको बसाइँमा छन् ।
किनभने,
हुरी, बतास अनि मेघ गर्जन सहितको असिना बर्सातले
बोटमा चोट छ, पुलमा घाउ छ
अनि,
सबै तिहारका फुलहरू स्तब्ध छन् ।
रोएका छन् तिहारको मुखैमा
दिदी भाइको तिहारमा
त्यसैले,
प्रश्नहरू आफैसित गरे,
प्रश्नहरू हुरी बताससँग गरे,
र असिना वर्षात सँग गरे ,
तर– तर
उत्तर पाइनँ कसैबाट पनि ।
आज यस्तो कुठाराघात किन ?
अरूको जीवन
तहस नहस र बाधा पुराउने किन ?
शरद याममा असिना वर्षात किन ?
सोधे प्रश्न इन्द्र देवसँग
मान्छे प्रकृति बिगार्दै छ त्यसैले, प्रकृतिको नियम भन्दै
इन्द्र देव! मुसुमुसु हाँसिरहे !!
उता फेरि,
तिहार यामका फुलहरू शोकाकुल थिए
केही बोलेनन् ।
कहिले खडेरीको घाउ,
कहिले फेरि रिमझिमे वर्षातको
मलम भनेजस्तो र सोचेजस्तो पक्कै छैन,
फुलको जीवन असहज परिस्थितिमा
जस्तो जे भए पनि
आफ्नो काम र कर्तव्य पूरा गर्दै
प्रकृतिलाई रङ्गिन र सुगन्धमय बनाएर
तिहारका फुलहरू पनि हराउँदै थिए !!!
कवि परिचय
नामः सरद बिष्ट
ठेगानाः स्वर्गद्धारी न.पा. –३, प्यूठान
शैक्षिक योग्यता : बि.ए., बि.एड.(अंग्रेजी)
पेशा : शिक्षण र साहित्यक रचना प्रकाशन
