१४ माघ, काठमाडौं ।सहिद स्मारक ‘ए’ डिभिजन लिगमा आज दुई खेल हुँदैछ। आज हुने पहिलो खेलमा हिमालयन शेर्पा क्लब र सरस्वती युथ क्लब भिड्दै छन्। दुवै खेल सातदोबाटोस्थित एन्फा कम्प्लेक्सको खेल मैदानमा हुनेछ । यस्तै, दिउँसो ३ बजे त्रिभुवन आर्मीले जावलाखेल युथ क्लबसँग प्रतिस्पर्धा गर्नेछ ।
हिमालयन शेर्पासँग खेल्दा सरस्वतीको लागि ‘गर’ या ‘मर’को अवस्था हुनेछ । ८ खेलबाट मात्र १ अंक रहेको सरस्वती अंक तालिकामा पुछारमा छ र रेलिगेसनको दबावमा छ । उति नै खेलबाट हिमालयन शेर्पा ७ अंक जोड्दै १२ औं स्थानमा छ । शेर्पालाई हराउन सके सरस्वतीलाई ठूलो राहत मिल्नेछ ।
उपाधि होडमा रहेको आर्मीका लागि आजको खेल महत्त्वपूर्ण छ । जावलाखेललाई हराएमा आर्मी पुनः शीर्ष स्थानमा उक्लनेछ । उता, ८ खेलबाट १२ अंकसहित जावलाखेल सातौं स्थानमा छ । आर्मीलाई हराउन सके जावलाखेल पनि चौथो स्थानमा उक्लनेछ ।
