४ वैशाख, तनहुँ।
नयाँ शैक्षिकसत्र शुरु भएसँगै जिल्लाका सामुदायिक विद्यालयमा भर्ना हुनका लागि विद्यार्थी आकर्षित भएका छन् । शैक्षिकस्तर राम्रो भएका सदरमुकाम दमौली आसपासका सामुदायिक विद्यालयमा भर्ना हुनका लागि विद्यार्थी आकर्षित भएका हुन् ।
जिल्लाकै नमूना विद्यालयको रुपमा स्थापित जिल्लादेखि केन्द्रीयस्तरसम्म राम्रो छवि बनाउन सफल सत्यवती माविमा भर्ना गराउनका लागि यतिखेर भीड बढेको छ । उक्त विद्यालयका प्रधानाध्यापक इन्द्रप्रसाद पौडेलले विद्यालयको शैक्षिक गुणस्तर राम्रो भएकाले विद्यालयमा भर्ना गर्नेको चाप बढेको बताए ।
विद्यालयबाट गुणस्तर शिक्षा प्रदान, प्राविधिक शिक्षा, कम्प्युटर शिक्षा, ल्याव, पुस्तकालय, नयाँ–नयाँ प्रविधि, पूर्वाधारलगायतका सुविधाले गर्दा विद्यालयमा भर्ना हुन विद्यार्थीको आकर्षण बढेको हो ।
उनले भने, “विद्यार्थी सङ्ख्या वृद्धि गर्नेभन्दा पनि घटाउने तयारी भएकाले प्रवेश परीक्षाको व्यवस्था गरेका छौ ।” नमूना विद्यालयको मापदण्डअनुरुप विद्यार्थी भर्ना गरिनेछ, उनले भने,, “शिक्षा विधेयकबाट एसईई उत्तीर्ण गरेका विद्यार्थीका लागि राम्रा विषयमा अध्यापन निःशुल्क र छुटको व्यवस्था रहेकाले निजी विद्यालयका विद्यार्थी बढी आकर्षित हुने गरेका छन् ।
निजी विद्यालयबाट एसईई उत्तीर्ण गरेका विद्यार्थीले राम्रा विषय अध्ययन गर्नका लागि ठूलो रकम खर्च गर्नुपर्ने हुँदा निजी विद्यालयमा अध्ययनरत विद्यार्थी सामुदायिक विद्यालयमा भर्ना हुनका लागि बढी मात्रामा आउने गरेको उनले बताए ।
“विद्यालयमा आवश्यकभन्दा बढी बालबालिका भर्ना गराउन आएका छन्, तर सबैलाई भर्ना गर्न सकिँदैन”, विद्यालय व्यवस्थापन समितिका अध्यक्ष सूर्य अधिकारीले भने, “त्यसैले बालबालिका छनोट गर्न प्रवेश परीक्षाको व्यवस्था मिलाएका छौ ।”
जिल्लाकै नमूना विद्यालयको रुपमा स्थापित उक्त विद्यालयले उत्कृष्ट नतिजा हासिल गर्दै आइरहेको छ । गत वर्षहरुमा जिल्लाकै उत्कृष्ट रहेको उक्त विद्यालय तीनपटक पश्चिमाञ्चल उत्कृष्ट भएको थियो ।
झन्डै दुई हजार ७०० बालबालिका अध्ययनरत उक्त विद्यालयमा वर्षैपिच्छे भर्नाका लागि बालबालिकाको भीड बढ्ने गरेको छ ।
शैक्षिक गुणस्तर, अङ्ग्रेजी नेपाली दुवै भाषामा पठनपाठन, व्यवस्थापकीय, शान्ता वातावरण, विद्यार्थी अभिभावकबीच छलफल र अन्तरक्रिया, कमजोर विद्यार्थीका लागि अतिरिक्त कक्षाको व्यवस्था, कक्षा ११ र १२ मा कानून शिक्षा, सिटीइभिटीबाट सम्बन्धन प्राप्त गरी सिभिल इञ्जिनीयरिङ शिक्षालगायतका कारणले गर्दा विद्यार्थी भर्ना हुन आकर्षित हुने गरेको छ ।
