नेपालगन्जको सुर्खेत रोड स्थित गुरुद्वारा अगाडी मध्य रातमा आगो लाग्दा दर्जन बढी फर्निचर पसलहरू हरू जलेर नष्ट हुँदा १० करोड बराबरको क्षति भएको छ ।
गुरुद्वारादेखि उपमहानगरपालिकाको छेउसम्मका दर्जनभन्दा बढी फर्निचर पसल आगलागीबाट खरानी भएका छन् । ‘फर्निचर पसल रहेकाले आगो नियन्त्रणमा आउन गाह्रो भएको थियो । नेपालगन्जका दुई, कोहलपुरको एक र नेपालगन्ज विमानस्थलमा रहेको एक गरी चार दमकललाई आगलागी नियन्त्रणमा लिन हम्मे हम्मे परेको स्थानीय बासिन्दाले बताए ।
आगो लागेको ४ घण्टा पछि मात्रै दमकल, प्रहरी र स्थानीय बासिन्दाको सहयोगले नियन्त्रणमा आएको थियो ।
जिल्ला प्रहरी कार्यालय बाँकेका प्रहरी प्रमुख एवं प्रहरी उपरीक्षक वीरबहादुर वलीको जानकारी अनुसार आगलागीबाट ७ देखी १० करोड सम्मको क्षति भएको अनुमान गरिएको छ । यकिन विवरण भने अध्ययन पछि मात्र थाहा हुने वलीले बताए ।
